منتديات بني بحير بلقرن - من روائع الامير بدر بن عبدالمحسن

ست قصايد من روائع مهندس الكلمه
الأمير بدر بن عبدالمحسن
أتمنى أن تحوز على رضاكم

_____________________
الرياض

في الليالي الوضح ..
والعتيم الصبح ..
لاح لي وجه الرياض ..
في مرايا السحب ..
كفّها فلة جديله من حروف ..
وقصة الحنا طويلة .. فـي الكفوف
من نده عطر الرفوف ..
لين صحاه ..
في ثيابك يا الف ليله..
وفي الهبوب ..
انثنينا يا هبوب النعاس .. والحلم ..
ألف غصن من اليباس ..
فز لاجلك .. وانثنى ..
اكسري الاوهام كاس ..
وان عشقتيني انا ..
ما ابي من الناس .. ناس ..
ما علينا .. لو طربنا وانتشينا
آه .. ما ارق ( الرياض ) تالي الليل ..
انا لو ابي ..
خذتها بيدها .. ومشينا ..

***
يا نصيبي من الصور .. والرسايل
ومن كل شمس قايمه .. ومن كل ظلٍ مايل ..
يا مكاني من البيوت ..
ومن الصحاري اللي .. فرقت فكري قبايل ..
وين احب الليله .. وين اهيم ..
اقبلي مثل ديم ..
أو غصون النار تنبت فـي الغضى ..
وبين ما خلى من النخيل الفضا ..
وما نسى الغيم ..
أقبلي .. يا بختري عيوني من الربيع ..
وطل وجهي من الشتا ..
ومثل صوتي من الهبوب ..
اقبلي مثل الرياض ..
من تعاريج الدروب ..
في ضلوع الوادي ..
وين حبيتك قمر .. فوق طين أجدادي ..

***
وين احب الليله .. وين أهيم ..
ارفعي طرقة الشيله .. عن سديم ..
وكوكبٍ وهاج ..
اقطعيني بنصل طرفٍ سادرٍ وحجاج ..
شقيقيني يالهبوب العارضية ..
واهدمني سياج ..
لين أغني الهوى ما هو خطيه..
يالعفاف اللي تسربل بالبياض ..
كل ما قربت يدينا ..
ناض طير.. وجض ريم ..
ما علينا ..
آه .. ما ارق الرياض تالي الليل ..
انا لو ابي ..
خذتها بيدها .. ومشينا

_______________________

((تخيل ))
تاقف على اطراف الهدب .. وماشافتك عيني
صافحتني ومدري يدك هي لمست ايديني ...
سلم .. ابارد السلام ..
وهذا ترى كل الكلام ..
اللي بقى بينك وبيني ...
تخيـّــل ...
من وين ... ومنين ومتى ...
بالله ذكرني ...
بالله ذكرني ... متى
جيتك انا فـي ليلة شتا ..
تهزني ريح الشمال ...
محتاج انا لبسمه وشال ...
تركتني لبرد الطريق وانا على بابك ..
اتذكر انك قلت لي بالله وش جابك ..
ودعتني قبل السلام .. وهذا ترى كل الكلام
اللي حصل بينك وبيني ...
تخيّــــل ...
اليوم لعيوني السما والارض البعيد ...
اليوم ولغيرك انا يطري على بالي القصيد ...
اشتقت للقلب الخلي ..
وش هم .. لو تعتب علىّ ..
جيتك انا فـي ليلة ألم .. قلبي على كفي ...
همست لي روح ياغريب الشوق مايكفي ...
سلم ابارد السلام ...
وهذا ترى كل الكلام ...
اللي بقى بينك وبيني ...
تخيّــــل ...
________________________

الفتاة الغايبة

و سـلامـي .. لمن سـأل عـنـي ..
أنـا من أشعـل .. عـيـون الفـتـاة الغـايبـه.. شـمـس بـكـلامي..
ليـن تـركـوني النـاس .. و راحـوا لضـي عـيـونهـا ..
و رجـعـت نفـسـي طـايبـه.. أجـرّ ظـلـّي ..
و كـان لي .. ظـل ثـقيـل .. تعـلق .. بعـود نحيـل ..
و القـلـب رجـل عـايبـه .. ترقـا جـبـل ..
ردوا ســلامـي .. لمـن سـأل ..

يحـينـي الـكـلام .. قـولي .. قـولـي أعـرفـك ..
انت من يحـمل جـذوع الـشـجـر للـماء.. ولنـور القمـر ظـلمـا..
أنت اللـي مـردت الـقــوافـل .. تطـلب التـرحـال ..
و زيّـنـت الـشـمـال.. نجـمـه .. وعـلـّمـت الغــلام .. اســمـه ..
ليـن انتـهـض .. رجـال .. يحـيني الـكـلام .. قـولـي ..
في بعـض الـكـذب .. رحـمــه..

الوقـت يمضـي .. صـديـقتـي.. والنـاس تمـضـي ..
وهـالحـراس باقيـن .. على ورق هـالـتيـن ..
والكـوكـب الفضـي .. والبـوح بالأحـسـاس ..
تتـغـيـر الألـوان .. الا الـسـواد .. متى الـسـواد يمـضـي ..
تـوي رفـعـت الأرض .. سـجـده .. وســبّحـت لـه.. وحـده ..
و صـار الـرمـاد .. ومـضـي .. و كـل الـذنـوب .. غـبـار ..
و دمـوعـــي الأمـطــار ..

صـديقـتـي .. يحـينـي الـكـلام .. قـولي .. لمـن سـأل ..
أنا من اشـعـل عيون الفـتـاة الغـايبـه .. تيـه وخجـل ..
ليـن تركـونـي الناس .. و رجـعـت نفــسـي .. تايبـه ..
مـن كـل.. مـا في النـاس .. و كـل مـا فـينـي .. الا .. الكـلام ..
أنا..الكـلام يحـيني .. يحـيني الكـلام .. قـولي ..
لاجـل الفتاة الغايبـه .. من هالعــتيـم .. تعـود ..
وردي سـلامـي لمن سـأل .. ان كـنت أنا مـوجـود.. مـوجـود..
و الحـلـم .. رجـل عـايبـه .. ترقـا جـبـل ..
و سـلامـي للـفتـاة الغايبـه ..

________________________

لو تغيبي

لو تغيبـي ولو رحـل وجهك حبيبـي

في غيابـي عنك أشوفك .. وفي عذابـي منك أشوفك

صـدقينـي مـا نـقـص هالليـل بعدك إلا قمـرا

وما فـقـدت من النهـار إلا شعاع الشمس بكـرا

واجمل الناس حبيبـي ..

لو تغيبـي لو رحـل وجهك حبيبـي

تصغر الدنيا وتضيـق

كلّ مافي الدنيا أعرفه إلا بيتـي والطريق

أنا أحبك ذا نصيبـي .. إبعدي عني وغيبـي

صـدقينـي مـانـقـص هالليـل بعدك إلا قمـرا

ومافـقـدت من النهـار إلا شعاع الشمس بكـرا

لك ليـالي ما سألتـي .. ولي ليـالي ما سـألت

ولو دريت إنك زعلتـي .. كان أفرح مـازعـلت

بس داري مافي قلبـك إلا قلبـك

واختياري إني أحبـك والا أحبـك

ومن عذاب الحب يكفـي لو تجرّح قلب واحد

وإنتي يا حبـي وضعفـي لا يهمك كله واحد

لجل تتغير فصول .. ويبكي الغيـم في عيونـي

وتزهر جبال وسهول .. اضحكي بيـّا وبدونـي

وصدقينـي مـا نـقـص هالليـل بعدك إلا قمـرا

ومافـقـدت من النهـار إلا شعاع الشمس بكـرا

_______________________

تجاعيد الجبل قصيدة

إن طحت بوصيك
لا تمدلي يد ... ولا تنتظرني ...
رح ...
( السفح مثل الردى راحه )
عالي الجبل ... مدري الزمن ...
والا العمر ...
والشمس .. يا رمضا وجمر ...

وعلى تجاعيد الجبل .. تشقق ...
إجباه ٍ سمر ...
ويطيح ... لا بد ... أجدٍ يطيح لا بد ...
( والسفح مثل الردى راحه )
وان طحت انا بوصيك ...
لا تمد لي يد ...
ولا تنتظرني ... رح
نرقى بشوق أحلامنا ...
نرقى وعر أيامنا ...
نرقى بأمل ... أحد ... وصل ...
اللي نقول بزعمنا ... انه وصل ...
وبخوف إنسانٍ يطيح
نرقى لتعبنا ونستريح ...
لجل التعب ...
وبلا سبب ... محدٍ يبي يدري السبب ...
( والسفح مثل الردى راحه )
يا صاحبي ... ترى إن طرى لك ... طح ....
وان طحت أنا بوصيك ...
لا تمد لي يد ... ولا تنتظرني ... رح ... رح

______________________

حسايف

التفت ...
وتوها ... توها ما اختفت ...
ماكساها الليل ... باللون الحزين ...
التفت ... وتعالت صرخته ...
في نظرته ...
صاح ... لكن بالنظر ...
وانكسر .... شوفه عثر ...

حسايف .. تذبل الضحكه وهى بين الشفايف ..
تذبل الفرحه وتضيع ...
ويصبح الكون الوسيع ...
مايكفي خطوتين .. لاكساه الليل بااللون الحزين ..
يوم مدلها يده ..
كانت الرجفه لقا ..
ودعت فيها الشقا ..
وتركت بين الاصابع ..
عطرها ..
وعمرها ... ما جت على وقت الوعد ...
إلا ذاك اليوم ...
و عمرها ... ما بكت .. و ما ضحكت ...
ما حكت له .. واسكتت
مثل ذاك اليوم ...
كانت أجمل من خياله ... كانت انضر ...
كانت أكثر ... من أماني عمره الظامي حنين ..
و اختفت ... من كساها الليل باللون الحزين

اختفت في الطريق اللي معه ...
كانت تجيه ...
كيف دربٍ جمعه معها ... خذاه ...
ليتها اختارت سواه ...
تزرع القرقا لياليها ... عليه ...
وحسايف ... حسايف ...