آهـ يا ربّي لو الأمــر في مُلك اليـديـن
......................... كان والله دمعتــك ـ لو أموت ـ ما تطيــح

ألف بسم اللـه عليك من الزعل يا أطهر جبين
........................ يا بعد حيّي دمــوعك غميضة لا تسـيـح

لمـلـم دموعـك حبيبي طلبتك حاجتين :
....................... لا تخلّي حب نصرك وبرضوه لا تصيح

جعلني فـدوة قليب(ن) مقطّعه الحنيـن
....................... كل ماقرّب يشوف النصر يتفاجأ : جريح !

ووهـ يا علّك بعدنا , فديتك : عين .. عين
..................... يا معلمنا عن العشــق بالمعنى الصحـيـــح

حسّس اللي ما يحـسّـون مع مَـرّ السنـيـن
..................... ما دروا بإن التــــواريخ دايم ما تبـيــــح !

وإحقر اللي كل همه يجـــمّــع مُعـجبين
.......................واعقد حجاجك إذا شفت عِـشاق المـديـح

ضَحّ , حِبّ , اعشق , تفانى وخل العاذلين
....................... لا يغرّونك , تــراهم يـعرفون الصحيح

وكان أحد قد قال لك : نصركم ماهوب زين !
...................... قل بعد يا جـيت للصـدق تر ماهو قـبـيـح

وخل نظراتك لخصمك غرور بربع عين !
...................... إلمحه لمــحـة تحــدّي عن لـسانٍ فـصيـح

أدري منت بعنصري وأصل كل الناس طين
..................... بسّ نـصـــراويتك مثل هذا لك تـتـيـــــح

شفت لو قارنت بين النصر هو والآخرين ؟
................قلت غيره : فص ثوم , ونصرك : خزامى وشيح

سِحر يا بابا سِحر وتوّ بعد ماشفت شِين !
.................... كل مـا تتعـــب عشـــانه كـأنّك تستــريح !

مـن كثر حبه يخلّيك لعيـــونه رهيــن
.................. وكل ما أعطيته تحسّ إنك ـ وربي ـ شـحـيـح

يأنّبك ضميرك إن ما دخلته باليمين !
.................... ولو دخلته بالشمال إنت من عينك تطـيـح !

له تنازل عن بريستيجك ـ رضا ـ في كل حين
.................... وتنذر أيامك لخاطر رضاه المستـبيـــح

فيه أحد قد قال لك يوم مع طول السنين :
................... إن به عاشق حقيقي من همومه إمْريح ؟!