طعم العفو علقم قلوب الرجاجيل .. - علّمت ضحكات الزمان تهجرني وقرّبت لدموع الليال المناديل أخطيت لكن ما أبيك تعذرني طعم العفو علقم قلوب الرجاجيل ما طحت يومٍ العدوّ يعثرني أنا أنعثرت بهقوة البنّ والهيل والله ماقدر الزمان وقدرني اللي غرسها بين حدبٍ مناحيل جبرت كسره لين سلم وكسرني لكن بسيطة والليالي مقابيل ما الله على بعض الأوادم جبرني لكن هقاوي والهقاوي غرابيل قلبٍ لو أبطي بالغياب أنتظرني وقلبٍ يقطّع في حبال المواصيل أحيان حاجات الزمان تعسرني وأحيان أكمّل نقص وأزوّد الكيل وأعزّ لي قومٍ مناه تحقرني وأردّ دون وجيههم غارة الخيل واللي حضرت لضيقته ما حضرني ماني وراه مدوّر القال والقيل كانه لقى له زلّة وما سترني فأنا أستره عن قرقعات الفناجيل والله لو أنّ الصبر أنا ماصبرني لكن تروح بعون ربّي تساهيل عذرت وقتي يوم ضاق وزفرني ماظلّ به حيلٍ ولا ظلّ بي حيل غنّيت يومٍ القصيد أعتبرني حاديه عن رمضا الحنين المواويل واليوم كنّي حبّه اللي نثرني للريح وأفواه المقادير و الليل مدري من اللي يوم أغيب أفتكرني الفقد صار أغلبه كذبة وتمثيل لكنّي أعرف واحدٍ ما ذكرني وأنا أحسبه لاطحت بحمولي يشيل كنّه لساعة موت قلبه ذخرني أختار وقت تميل الأيام ويميل لا يحسب أنّه يوم يقفي كسرني خسرت الأثمن منه ماقلت ياويل قلبي , وياكثر الزمان أختبرني قبله وطفّيت السهر والقناديل مبطي وأنا أكرب ضيقتي وأختصرني واليوم فاض بما حوى صدري الكيل لِ شاعرها / نواف التركي |
رد: طعم العفو علقم قلوب الرجاجيل .. رائعه بروعة اطلالة الفجر البعيد قصيدة من الوزن الثقيل يتعب الحرف في وصفها ويقف صامتاً |
رد: طعم العفو علقم قلوب الرجاجيل .. صح لسانك |
رد: طعم العفو علقم قلوب الرجاجيل .. صح لسانك |
رد: طعم العفو علقم قلوب الرجاجيل .. اقتباس:
صح لسان من قالها أنتقاء رائع |
رد: طعم العفو علقم قلوب الرجاجيل .. جميلٌ هذآ الطّرحِ بكلّ ماحَوى . ولَا عجبْ . |
الساعة الآن 05:20 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 PL2
ارشفة ودعم SALEM ALSHMRANI
F.T.G.Y 3.0 BY: D-sAb.NeT © 2011
جميع الحقوق محفوظة لمنتديات بني بحير بلقرن