|
رمضان اخر روقان 🎆🌜 مع ضغوط الحياة اليومية، "الروقان" بقى هدف كلنا عايزين نحققه في حياتنا، بس ياترى هو إيه مفهوم "الروقان" عندنا ؟ ممكن نلخص شعور "الروقان" بإننا ننسى كل الضغوط والتوتر والعصبية اللي في الدنيا ، وإننا نوصل لحالة الهدوء الداخلي والسلام النفسي والراحة القلبية والذهنية فالبعض مننا ممكن يلاقي "الروقان" مع فنجان من قهوته المفضلة ،والبعض ممكن يلاقيه في قعدة هادية على البحر🏖 ،والبعض ممكن يلاقيه في قراءة كتاب شيق 📕،والبعض ممكن يلاقيه في سماع حاجة بيحبها .. إلخ .. ولا شك إننا كلنا محتاجين "الروقان" في حياتنا علشان نجدد طاقتنا ونشحن قلوبنا كل شوية وشهر رمضان الكل بيعتبره إنه شهر إيمانيات وموسم كبير جداً لتجديد الطاقات و الروحانيات ؛ وعلشان كده إحنا عايزين ندور على الأسباب والوسائل اللي تخلينا نستمتع بكل لحظة في الشهر الكريم المبارك ، اللي ربنا عزوجل جعله أجمل استراحة للنفوس في السنة كلها،ونعيش فيه معنى الروقان . كثير من الناس ، سواء شباب أو كبار ، أصبحوا بيشتكوا من مشكلة كبيرة ورئيسية في شهر رمضان ، بل وأيضاً في غير رمضان ، وهي إن : الواحد بقى مش حاسس بأي حاجة ! مش حاسس إنه رمضان خالص !! حاسس إن الدنيا باهتة ومش عارف يصلي تراويح ولا حاسس بالصيام ولا عارف يحس بالقرب من ربنا !! مش عارفين نعيش جو رمضان !! الواحد مش حاسس بطعم العبادة ولا الإيمانيات !! مش حاسس بالمعاني والكلام اللي بنقعد نسمع عنه من حلاوة الايمان ولذة الطاعة وسعادة القلب والحاجات الجميلة دي ! وتلاقي شاب يقولك أنا عدى عليا كام رمضان، وبقالي كام سنة بصوم وأصلي الفروض وكمان التراويح وأختم المصحف مرة واتنين ومع ذلك مش بحس بأي تغيير إيجابي في نفسي أو حياتي ! بل ممكن أتغير للأسوأ بعد رمضان!! يا ترى يا شباب ايه اللى ممكن يكون مضيع فرحتنا وإحساسنا بالعبادة في رمضان ؟؟ يا ترى ليه بندخل رمضان وبنخرج منه من غير ما نتغير مع إننا بنتعبد فيه وبزيادة كمان ⁉️ #يتبع غداً بإذن الله #رمضان_اخر_روقان #مصطفى_زايد |
رد: رمضان اخر روقان 🎆🌜 2️⃣ رمضان آخر روقان 🎆🌜 يا ترى يا شباب إيه اللى ممكن يكون مضيع فرحتنا وإحساسنا بالعبادة في رمضان ⁉️ يا ترى ليه بندخل رمضان وبنخرج منه من غير ما نتغير مع إننا بنتعبد فيه وبزيادة كمان ⁉️ لو تأملنا هنلاقي إن أساس المشكلة وأصل الحكاية من البداية هو: عدم فهمنا الصحيح لصحة العبادة يعني إيه ؟؟ يعني العبادة للأسف الشديد في نظرنا ما هي إلا مجرد حركات بنعملها وكلمات بنقولها من غير ما يصاحبها أي روح أو معاني ..بدون أي استشعار لعظمة الله والتذلل والانكسار والاستسلام له ، بدون أي استشعار للثواب والعقاب اللي مترتب عليها ‼️ وعلشان كده اتحولت عباداتنا إلى طقوس وعادات، فأصبحت الصلاة مجرد تمارين رياضية والزكاة كأنها ضريبة من الضرائب💰 بندفعها .. والصيام نوم بالنهار وأكل بالليل ! أما الحج ففرصة علشان نتصور سيلفي مع الكعبة🕋 !! فأصبحت النتيجة المؤلمة اللي كلنا شايفينها قدام عنينا وبنشتكي منها: إنسان بشخصيتين متناقضتين ‼️ تلاقيه مش بيبطل صلاة وصيام وصدقة وحج وعمرة وبيحفظ قرآن ومع ذلك تلاقيه مش أمين وبيغش ويكذب ويرتشي ويسب ويلعن ومعاملته أسوأ ما يكون مع أهله وزوجته والناس كلها ! وأي حد هيحاول بس يدقق لثواني في القرآن والسنة ، هيشوف وهيعرف من الآيات والأحاديث إن المقصد من العبادة ليس فقط أداؤها من الناحية الشكلية اطلاقاً ، بل المهم والأهم هو أداؤها بطريقة تحقق هدفها والغاية اللي أرداها الله لنا من فرضها علينا . وعلشان كده هنلاقي ربنا قال في القرآن في مواضع عديدة : {وَاللهُ يُحِبُّ المُحْسنينَ﴾ ، ﴿وَاللَّهُ وَلِيُّ الْمُتَّقِينَ} {إن اللهَ مَعَ الصَّابِرِينَ ﴾ ، ﴿وَاعْلَمُوا أَنَّ اللَّهَ مَعَ الْمُتَّقِينَ} فربنا لم يَقُل (مع المُصلِّين) أو (مع الصائمين) أو (مع المُعتمرين) وده لأن معية ربنا* مش هتكون لواحد مجرد أدى الصلاة كحركات ،أو صام كام ساعة عن الأكل والشرب وخلاص ، أو دفع فلوس علشان يسافر مكة كام يوم ويرجع تاني ، لأ دي هتكون للي وصل لهدف العبادة وحصل الثمرة اللي ربنا يريدها ، فحقق من وراها التقوى والاحسان والصبر .. وساعتها هيفوز بمعية الله صحة العمل أمر مختلف تماما عن قبول العمل، يعني مش أى صلاة ربنا بيقبلها ! لازم تكون صلاة بقلب مقبل إلى الله وعقل مركّز، مش سرحان ولا عارف بيقول إيه!مش أى صيام ربنا هيقبله ! لازم يكون صيام قلبك وصيام عينك👀 ولسانك، مش مجرد معدتك وفرجك !! #يتبع غدا بإذن الله #رمضان_آخر_روقان |
رد: رمضان اخر روقان 🎆🌜 3⃣ رمضان آخر روقان 🎆🌜 ربنا بيقول{ ليبلوكم أيكم أحْسَنُ عَمَلاً }، ربنا لم يقل (أكثر عملاً )، لأن العبرة بحُسن العمل مش كثرته ! و كان من دعاء النبي ﷺ : (وأسألك شكر نعمتك وحسن عبادتك )، وأيضاً : ( اللهم أعني على ذكرك وشكرك وحسن عبادتك ) .. شوف إنت ممكن تكون قلت الدعاء ده كام ألف مرة قبل كده وماخدتش بالك من كلمة "حسن" دي خالص ..‼️ فالنبي ﷺ قال (حسن عبادتك) ، مش (كثرة عبادتك) ! النبي ﷺ قال (حسن عبادتك) ، مش مجرد (عبادتك) فقط ! وده لأن العبادة اللي الواحد بيعملها أي حاجة لمجرد اسقاط الواجب عنه ملهاش أي لازمة !! وده اللي بيتّضح بصورة صريحة جداً جداً في حديث الرجل اللي دخل المسجد وصلى بسرعة وقام ، فالنبي ﷺ شافه وقال له : (ارجع فصل ، فإنك لم تُصَلّ)متفق عليه تخيل بقى كام واحد فينا النبي لو شافه بيصلي هيقوله :( ارجع فَصَلِّ ، فَإِنَّك لم تُصَلِّ ) وفي حديث تاني بيوضح نفس المعنى ، قال النبي ﷺ:(تلك صلاة المنافقين ، يجلس أحدهم حتى إذا اصفرت الشمس ، قام فنقر أربعاً ، لا يذكر الله فيها إلا قليلاً ).رواه مسلم أصبح هدفنا وتركيزنا على "الكم" وليس "الكيف" ! وهو ده للأسف اللي بيخلينا نشوف الخناقة المشهورة اللي بتحصل على مواقع التواصل في رمضان كل سنة : هو إيه أحسن ؟؟ أختم القرآن أكثر ولا أقرأ بتدبر أحسن ؟؟ لو فهمنا الكلام اللي فات ، هنعرف كويس أوي إن "مارثون الختمات" و "مارثون الصلاوات مش بيغيّر سلوك ولا بيأثر في القلب ولا بيجيب أي نتيجة !! والدليل الواضح إنك بعد كل اللي بتعمله في رمضان بترجع لنفس حالتك قبل كده ! كلنا جربنا قبل كده القراءة بسرعة، وكان هم الواحد مننا هو ختم القرآن أكتر من مرة ، بس هل فيه أي استفادة حقيقية استفدناها من كده ⁉️ إيه اللي القرأن غيّره فينا ⁉️ إيه التحسن اللي حصل في أخلاقنا ومعاملاتنا من كترة القراءة باللسان والحناجر فقط⁉️ ❎ ومش معنى الكلام ده الزهد في الأجر والثواب المترتب على أداء العبادات ، بل المقصود هو إحسان وإتقان العبادة أولا، مع الاجتهاد في حضور العقل وتفاعل القلب معها، ثم بعد كده كثر منها زي ما إنت عايز، وبكده تكون جمعت بين الأمرين وتنال ثوابهم مع بعض، الإتقان و الإكثار ... ✅ يعني نوازن ما بين "الكم" و "الكيف" بقدر الاستطاعة #يتبع غدا ان شاء الله #رمضان_آخر_روقان #مصطفى_زايد |
رد: رمضان اخر روقان 🎆🌜 4⃣ رمضان آخر روقان 🎆🌜 📝خطوات مهمة تعالوا نشوف بعض الخطوات والنصائح العامة اللي ممكن تساعدنا علشان كل حاجة بنعملها في رمضان تكون باحتراف وروقان، وسبب في القرب من الله 1⃣* استعد جسدياً للعبادة إزاااااااااي ؟؟ يعني تخيل نفسك رايح معاد مهم تقابل فيه شخصية رفيعة المستوى أو حد إنت بتحبه جداً ، تخيّل إنت بتجهز نفسك وبتتهيأ للمعاد ده إزاي ؟؟ طبعاً بتبقى في أحسن وأجمل وأكمل صورة 👔. ولله المثل الأعلى، إنت في كل عبادة بتعملها بتناجي ربك الملك العظيم الجليل وبتُقبل عليه، فلازم تعظم الله جل وتعظم شعائر الله وتكون على أحسن حال، بإنك : ✅ تحاول تكون على وضوء قبل أي عمل ✅ ويكون فيه لبس نضيف ومكوي تلبسه حتى لو في البيت ✅ والمكان اللي هتقعد فيه يكون نضيف ومرتب وهادي ومفيهوش ملهيات .. ويا سلام لو خصصت مكان لكده ✅ وترش معطر جو أو تتطيب بأفضل عطور عندك .. • جرب الكلام ده وهتشوف أثره الرائع على قلبك قال تعالى: ﴿وَمَنْ يُعَظِّم شَعَائِرِ اللَّه فَإِنَّهَا مِنْ تَقْوَى الْقُلُوب} 2⃣ استعد نفسياً للعبادة إزاااااااااي ؟؟ يعني وإنت رايح تعمل أي عبادة تكون رايح لها بنفس، رايح لها باشتياق، رايح لها باحساس إنك محتاج للعبادة دي ، إحساس واحد مريض وتعبان ودي جرعة الدوا اللي محتاجها علشان تريحه إحساس إنك رايح تستمتع ، مش يبقى كل همك إن الحاجة دي تنقضي وعايز تستريح منها بأي طريقة !! مش بتعمل حاجة إنت مغصوب عليها ‼️لا دي حاجة إنت اللي محتاجلها ، ومتلهف عليها كمان ! مش روتين !! مش وقت بتحاول تعديه وخلاص ! يعني مثلاً وإنت رايح تجيب المصحف علشان تقرأ الورد بتاعك ، تخيّل كده وهيّأ نفسك كأنك رايح تفتح أغلى هدية🎁 جاتلك في حياتك من أحب صديق لك وتقوم تبص له كده وتبتسم وتضمه لصدرك وإنت فرحان ، وتلاقيك أول ما بدأت تفتح المصحف ، قلبك اتفتح معاه هو كمان، وصدرك انشرح للقراءة ، وبدأت تستمتع من قبل ما تقرأ حتى أي آية وهكذا في كل العبادات وفي كل حاجة في حياتك حاول تستمتع بكل حاجة بتعملها حاول تعمل كل حاجة بروح ونفسية جديدة #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 5⃣ رمضان آخر روقان 🎆🌜 📝تابع خطوات مهمة 3⃣ استعد قلبياً للعبادة* إزااااااااي ؟؟ يعني مهد الطريق الأول 🛣وافتح أبواب🚪 قلبك ؛ علشان تعرف تدخل في جو العبادة من البداية ..* مش على ما تقعد تحاول تحضر في قلبك تكون العبادة خلصت وإنت لسه يا دوب بتقول يا هادي !! * يعني لازم تشغل موتور العربية🚘 ، وتمشي شوية في الأول علشان يبدأ الموتور يسخن ، وبعدين تنطلق بقى زي ما تحب ..* * وكذلك قلبك .. حاول تستحضره الأول بعبادة بسيطة وخفيفة، علشان تعرف تدخل في جو عبادة تانية ويبقى إحساسك فيها عالي وقلبك خاشع ودماغك مركز ومش مشتت ، وتنطلق وتعيش معانيها بفضل االله فمثلاً .... ✅ قبل صلاة الفريضة ، تكون في المسجد وتصلي تحية المسجد أو السنة القبلية ..* ✅ قبل القيام ، تقعد تستغفر ١٠٠ مرة .. ✅ قبل ما تقرأ القرآن ، ممكن تصلي ركعتين خفيفتين ..* ✅ تسمع درس مؤثر ، وبعدين تقوم تستغفر .. ✅ تقول أذكار المساء بهدوء كده ، وبعدها تبدأ دعاء لحد المغرب .. وهكــــــــــــذا #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 6⃣ رمضان آخر روقان 🎆🌜 📝تابع خطوات مهمة 4⃣لابد من وجود الدافع والحافز أكتر حاجة بتخلّي الإنسان زاهد في الشئ اللي معاه ، هي : عدم معرفة قيمة الشئ ، وعدم إدراك أهميته ! يعني لو واحد لقى جنيه ذهب على الأرض ، ولكنه مش عارف يعني إيه دهب ، هيسيبه ويمشي ولا هيبص له ‼️ إنما اللي عارف يعني إيه دهب بجد ، هيجري عليه بكل قوته وهيبذل كل جهده علشان يحصل عليه ! ولذلك قالوا: من عرف قدر الجزاء ، صبر على طول العناء ومن عرف حلاوة الأجر ، هان عليه مرارة الصبر ومن عرف قيمة ما يطلب ، هان عليه جميع ما يبذل وعلشان كده الناس لما عرفت قيمة الثانوية العامة وقيمة العربيات 🚘والعمارات🏢 والشاليهات، هان عليها التعب والسهر والصبر من أجل الحصول عليها !! ✅وإنت كمان لازم تقرأ وتسمع دروس وتحمّل مقاطع عن فضل العبادات وثوابها ومكاسبها وأرابحها اللي محدش يتخيلها، تعرف قيمتها وقدرها وأهميتها في دنيتك وآخرتك . مش معقول واحد صايم وميعرفش حديث واحد عن فضل الصيام!! ولو سألته يقولك الصيام ده حاجة حلوة وربنا أمرنا بها !! لازم تقرأ وتسمع وتعرف الفضائل علشان تستحضرها في نيتك وكل ما تزوّد في النوايا ، تزيد الهمة ، ويزيد الأجر ... ده إنت لو عرفت أحاديث فضل الصيام ، مش هتبطل صيام ! وهتبقي مُستمتع بالجوع والعطش وإنت صايم !! لو عرفت أحاديث فضل الصلاة، هتجري على الجامع من قبل ما تسمع الأذان ومش هتبقى عايز تخرج منه أبدا !!! ✅ معرفة فضائل الحاجة اللى هتعملها من أكبر الدوافع والمحفزات على التلذذ بالطاعة والصبر عليها والتمتع بها.. #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 7⃣ رمضان آخر روقان 🎆🌜 📝تابع خطوات مهمة 5⃣ إحساس المرة الأخيرة من أهم خطوات اتقان العبادة والخشوع فيها والإحساس بمعانيها؛ تهيئة النفس إنه المرة دي هتكون آخر مرة هتقوم فيها بالعبادة أصلاً وصية حبيبنا النبي ﷺ لنا لما قال : ( اذكر الموت في صلاتك ، فإن الرجل إذا ذكر الموت في صلاته لحري أن يحسن صلاته ، وصَلّ صلاة رجل لا يظن أنه يصلي صلاة غيرها ) صحيح ⬅️ فلو حسيت بقلبك إن ده آخر رمضان لك في الحياة ساعتها هتبقى قاعد متشوق له وعينك عليه .. خايف على كل دقيقة فيه .. وهتتعبد فيه وإنت في قمة المشاعر ⬅️ لو حسيت إن دي آخر صلاة لك في الدنيا وبعدها خلاص هتموت، هتلاقي دماغك مركز وقلبك حاضر بنسبة ۱۰۰ ٪، وهتلاقيك نسيت كل حاجة كانت بتشغلك وبقيت خاشع، ودموعك بتنزل وجسمك بيرتجف من الخوف والرجاء .. إحساس المرة الأخيرة ده هيخليك تعمل العبادة بروح عالية جداً ومشاعر مختلفة تماماً ... وكل ده مش هييجي إلا لما يكون عندك يقين إنك ممكن تموت في أي لحظة بدون أي أسباب أو مقدمات . فحاول توصل بقلبك للإحساس ده عن طريق ⬅️ كثرة زيارة المقابر، وتشييع الجنازات ، وسماع دروس عن الموت وخاصة موت الفجأة 6⃣ إدي العبادة حقها يعني إيه ؟؟ يعني لو عرفت تحدد وتخصص وقت للعبادة يبقى تمام، بحيث تقدر تجمع فيه قواك العقلية والجسدية وجميع الحواس في العبادة طيب لو معرفتش ؟؟ يبقى ما تروحش للعبادة وإنت مش فارقة معاك وناوي تكرّوتها علشان مستعجل وعايز تنجز، إديها حقها ومتستخسرش وقت أو جهد أو تركيز .. وإلا مستحيل هتعرف تحس بلذتها ومعانيها ... ❎ فاللي قاعد يدعي ربنا وهو ناوي يقول الدعوتين اللي حافظهم وينجز ، ده عُمره ما هيشعر بمعاني وروح الدعاء ❎ اللي ماسك المصحف وهو مستعجل وهمه إنه يوصل لآخر السورة ، وقاعد يحسب عدد الصفحات اللي باقية له ، ده عمره ما هيفهم أو يتأثر أو يتعايش مع القرآن ❎ اللي داخل يصلي وهو عايز الصلاة تخلص قبل ما تبدأ أصلاً علشان يلحق المشوار أو الماتش أو المذاكرة، ده عمره ما هيعرف يتلذذ أبداً بالصلاة ولا يحس بالخشوع ✅ فحاول ما تبقاش مشغول في وقت العبادة، وياريت تديها شوية اهتمام وتركيز وجهد*علشان تقدر تحقق مضمونها وتوصل للذّتها #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 8️⃣ رمضان آخر روقان 🎆🌜 📝تابع خطوات مهمة 7- التجربة خير دليل طبيعي جداً إن أي حد فينا ممكن يكون بيحب حاجة معينة ويفضلها عن غيرها وكذلك الأمر ده موجود برده في العبادات، وده لأن تأثير العبادة بيختلف من شخص للتاني 🟢 فيه واحد الصيام عنده أكتر حاجة بيحس فيها بالقرب من ربنا 🟢 واحد تاني عنده أكتر عبادة بيكون مستريح فيها هي الصلاة 🟢 واحد تالت قلبه مش بيرق ويلين غير مع القرآن .. 🟢 واحد رابع بيحب الصدقة جداً جداً .. وهكذا فحاول تختبر بالتجربة أي عبادة إنت بتحبها وتحسها أكتر جرّب في العبادات لحد ما تلاقي نفسك وشوف أكتر عبادة بتأثر فيك وبتلاقي فيها قلبك ..وامسك فيها وكثر منها ✅ 8- خليك فاهم مش حافظ 🟠 حاول ما تكونش شخص تقليدي في علاقتك بربنا يعني إيه ؟؟ يعني مثلاً لو ربنا فتح عليك في عبادة معينة وكنت محدد لها وقت معين ، ما تقومش بقى بسرعة بعد ما اتفتح لك، كمل وخد وقتك لحد ما قلبك يرتوي . 🟠 لو ربنا فتح عليك في عبادة معينة وماكانتش في أولوياتك، إمسك فيها و إبدأ ركّز أوي عليها لعلها تكون هي أرجى عمل عملته تلقي به الله يوم القيامة . 🟠 وكذلك لو بدأت متلاقيش قلبك حاضر في صلاة القيام، ممكن تبدلها بفترة إستغفار متواصل لحد ما تلاقي قلبك.. 🟠 لو بدأت تحس بسرحان في الختمة اللي إنت ماشي فيها، اوقف الختمه وإبدأ من أقرب سورة بتأثر في قلبك 🟠 لو بدأت تحس إن مفيش خشوع ورا الإمام اللي بتصلي وراه، شوف إمام تاني .. وقيس علي كده كل العبادات .. خليك فاهم مش حافظ .. اللاعب الحريف ⚽️ لو لقى جبهته مقفولة بيعرف كويس إزاي يغير مكانه في الملعب ! #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 9⃣ رمضان آخر روقان 🎆🌜 📝 تابع خطوات مهمة 9⃣ إبدأ بأي خطوة يعني ساعات بيكون وراك شغل أو عندك حاجة عايز تعملها سواء عبادة أو أي حاجة تانية في حياتك وبيكون عندك الوقت والجهد والمقدرة إنك تنفذها، ومع ذلك تبص تلاقي نفسك ملكش نفس ومش قادر وحاسس بكسل رهيييييب !!! وتلاقي نفسك بتسمع صوت من جواك عمال يقولك أجلها لبكرة أو مش مشكلة تعملها خالص، مجتش عليها، وبتبقى حاسس إن فيه بينك وبينها حاجز كبيييييير أوي لازم تخطيه علشان تعمل الحاجة دي !! ✅ وأنا بقولك إن الحاجز ده مجرد حاجز نفسي تافه جدا وعلشان تتغلب عليه ، ما عليك إلا إنك تقوم بس من مكانك وتاخد خطوة أو نص خطوة حتى في تنفيذ الشغل ده ..! حط رجلك بس على السلم 🪜واطلع أول سلمة! وهتبص تلاقي نفسك بدأت تكمل بقية الشغل وأنجزته🎯بكل سهولة ويسر بفضل الله يعني مثلاً لو عايز تقوم تصلّي، قوم بس و شمر دراعك وبعدين خد خطوة لحد مكان ما بتتوضا💦، هتلاقي نفسك بفضل الله بدأت وضوء وخلصت وجبت السجادة وصليت ركعتين وأربعة وعشرة كمان 0⃣1⃣ 📢احترس من التسويف والتأجيل ! التسويف والتأجيل من أكبر وأخطر الحرامية اللي بيسرقوا منك كمية وقت رهيييييبة ! وياريتك في الوقت اللي إنت أجلت فيه الشغل ده بتعمل حاجة؛ بل بيضيع منك الوقت ده وغيره ! بالإضافة إلى إن التأجيل هيزود الشغل عليك وتبص تلاقي الحاجات الصغيرة اللي بتأجلها بتتراكم فوق بعضها و تبقى نفسيًا حاسس إنها زي الجبل ومش قادر تبدأ تعمل أي حاجة منها !! طيب الحل إيه ؟؟؟؟ إنك تبطل تأجيل و تبدأ تعمل الحاجات اللي وراك ! الموضوع بسيط جدا #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣0⃣ رمضان آخر روقان 🎆🌜 📝تابع خطوات مهمة 1⃣1⃣ظبط نومك ! السرير الجميل🛏 ، عارفه ؟؟ هتقول: عارفه وحافظه كمان! هو أنا أعرف حد في الدنيا معرفة شخصية تفصيلية أكتر منه ، ده صديقي الصدوق!! ده اللي بينه وبينه قصة حب تتكتب في التاريخ 📢هقولك: اوعى تحاول تعبد ربنا وإنت قاعد على السرير أو وإنت جنب السرير أو في أي مكان في ربع سرير حتى!! ليه بقى؟؟ لأن طبعاً زي ما كلنا عارفين ومجربين إن السرير له قوة جذب مغناطيسية🧲 لا تقاوم !! فهتلاقي نفسك أوتوماتيكياً قعدت تريح، وكلها عشر دقايق بالكتير أوي وهتلاقي نفسك في العالم الآخر !!! فمتجيش بعد الفطار تقول همدد بس دقيقتين على السرير، أفرد رجلي علشان أعرف أصلي التراويح، هتلاقيك بعد الدقيقتين صاحي على أذان الفجر !!! أما بقى اللي بيقول أنا هذاكر على السرير فده أكيد عايز يذاكر كتاب "تفسير الرؤى والأحلام" ‼️ ✅ولو النوم كبس عليك جامد في أي وقت وإنت مثلا قاعد بعد الفجر في جلسة الشروق أو وإنت بتذاكر أو وإنت بتقرأ قرآن، قوم اتوضا أو اغسل وشك بشوية ميه باردة كل فترة ، هتلاقي نفسك فوقت وصحصحت بفضل الله .. ✅لو كنت قاعد قوم اتمشى شوية وكذلك حاول تغيّر وضعك أو غيّر مكانك وانتقل لمكان تاني اقعد فيه .. وهكذا.. وعايزك تتيقن إنك لو سبت نفسك للنوم،* هتلاقي نفسك نايم مش بس طول شهر رمضان، بل طول العمر ‼️ وده لأن النوم سلطان السلاطين، والبني آدم فينا بيموت في الكسل والأنتخة !!!! وبيعجبني أوي الفيلسوف اللي قال : ما أجمل أن ترتاح بعد أن لا تفعل شيئاً‼️ فأي حد بينام كتييييير، لازم يظبط مواعيد نومه، ويقلل عدد ساعات نومه تدريجياً لحد ما يوصل للمطلوب، اللي هو من 6 الى 8 ساعات بحد أقصى . - وطبعاً حد هيعترض ويقول : ٨ ساعات دول يعملوا إيه ؟؟! ده أنا بنام ١٢ ساعة ومش بيكفوني !! - هقولك : ده لأن جسمك اتعود على كده، إنما لو عودته على النوم 6 ساعات هياخد على كده وأقل من كده كمان ! ولما تبقى عايز تشد في النوم ، افتكر الحكمة اللي بتقول : [ أقلل من نومك ، فإن من ورائك نومة صبحها يوم القيامة ] ومش معنى كده إني بقولك ماتنمش أو نام 3 ساعات كفاية بالعكس، لو جسمك ما أخدش كفايته من النوم مستحيل هتعرف تركز في عبادتك أو تخشع فيها، وهتلاقي نفسك عمال تتاوب ومش قادر تفوق خالص ! والنبي صلى الله عليه وسلم هو اللي قال : ( إذا قام أحدكم من الليل، فاستعجم القرآن على لسانه فلم يدر ما يقول فلينصرف، فليضطجع ) صحيح وده برده مش معناه سرعة الاستسلام للشعور بالتعب والإجهاد، ولكن لابد من إعطاء الجسم حقه من الراحة علشان يقدر يقوم بالعبادة بالشكل الصحيح 🟢 فنظم مواعيد نومك ..وخد الموضوع بجدية .. وإلا هتلاقي الدنيا في رمضان كلها ملخبطة معاك ! #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣1⃣ رمضان آخر روقان 🎆🌜 📝تابع خطوات مهمة 2⃣1⃣ موبايلك📱 مفسد العبادات ! إحنا في عصر التكنولوجيا المهولة، وتقريباً مفيش حد دلوقتي مش معاه موبايل Smart Phone الموبايل الذكي ده ممكن يكون من أكبر نعم ربنا عليك في رمضان، وفي حياتك كلها .. طبعاً تقدر تحمّل عليه القران بسهولة جداً وفي أي وقت تقدر تقرأ وكمان عندك برامج للتفسير و برامج الأذكار والأدعية وتطبيقات اسلامية كتير جداً ده غير إنك ممكن تستخدم النت في معرفة التفسير أو قراءة في الفقه أو أي كتب دينية مفيدة أو الجروبات والصفحات الهادفة على مواقع التواصل بأنواعها وعندك كمان الموبايل نفسه ممكن تحمّل عليه كتب أو دروس أو قرآن وتسمع وإنت في المواصلات أو في الشغل وتستغل كل لحظة و كل وقت انتظار في أي مكان وعلى النقيض تماماً .. ممكن يكون الموبايل ده أكبر نقمة في حياتك وسبب شقاءك وضياعك في الدنيا والآخرة..وده عن طريق استخدامه في معصية الله، وكلنا عارفين البلاوي السودا اللي ممكن يوصلها الإنسان عن طريقه ..! اللي عايز أقوله إن في رمضان بالذات ، ممكن يكون الموبايل سبب ضياع رمضان منك ، لأنه : 🔸 أولاً : حرامي وقت مفيش زيه !! بيسحب وقتك ببراعة، ويقدر يسرق منك عمرك كله وانت ولا حاسس بأي حاجة !! فاحترس وحاذر من النت ومواقع التواصل فيس-تويتر-واتس واليوتيوب لأنك لو فتحت تبص ٥ دقايق بس، هيضيعوا اليوم كله زي ما إنت مجرب 100 مرة قبل كده ... فحاول على قد ما تقدر تحدّ منهم وتخصص لهم وقت معين في اليوم، وبعدها سلام عليكم ومتفتحش نت تاني. 🔸 ثانياً : بيفسد عليك عباداتك كلها، وبيضيع روحها وأهم ما فيها : اللي هو الخشوع والتركيز ! 🔴 يعني تبقى قاعد تقرا قرآن .. وهوب نوتيفيكيشن !! تقوم سايب القرآن وتروح تشوف إيه اللي حصل ؟! 🔴 تبقى قاعد تدعي ربنا .. وهوب صوت رسالة !! تقوم مخلص دعاء وتقوم تشوف فيها إيه ؟؟؟ 🔴 تبقى بتصلي وعامله فيبريشن في جيبك وعمال يرن ! وإنت خرجت عن الصلاة خالص وعمّال تفكر ياترى مين اللي بيرن؟! 🔴 تبقى قاعد في الاعتكاف وعايز تعبد ربنا ..شوية وتلاقيك فتحت نت في المسجد وقضيت الاعتكاف على الفيس ! ف إما تقفل التليفون خالص وإنت بتعمل أي عبادة أو تعمله صامت وتقفل النت، أو تسيبه بره الأوضة وتبعد عنه خالص ! واللي هيقول : أنا بستنى مكالمات مهمة جداً ؟؟!! هقوله: اعمل مكالماتك الأول وبعدين سيب الموبايل وروح أعبد ربنا، لأن طول ما الموبايل جنبك مش هتعرف تخشع أو تركز في أي عبادة ! مستحيل هتعرف تركّز في أي عبادة إلا لو انفصلت ذهنياً وبدنياً عن الموبايل ... الكلام ده من واقع وتجربة سنين !! #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣2⃣ رمضان آخر روقان 🎆🌜 📝 تابع خطوات مهمة 13- الخلوة نزهة الروح ! كلنا عارفين إن الصحبة الصالحة وروح الفريق والتعاون على الطاعة أمور مهمة جداً للثبات على الطاعة، ولكن خد بالك واحترس من كثرة الاختلاط بالناس فيما لا يفيد !؛ لأن ده من أهم أسباب قسوة القلب والوقوع في المعاصي ! هتقول : بس أنا هزهق لو قعدت لوحدي . هقولك : أنا مش بقول أقعد لوحدك طول العمر ده وقت صغير محدد من يومك، وجرّب كده الأول وشوف هتزهق ولا لأ .. ده الخلوة دي لها لذة وانسجام نفسي آخر حلاوة .. قيل لبعض الصالحين لما أكثر الخلوة : ألا تستوحش ؟؟ قال : وهل يستوحش مع الله أحد ؟!! وقال آخر: كيف أستوحش وهو يقول" وأنا معه إذا ذكرني"؟! ✅ فحاول يكون لك وقت ولو ساعة واحدة في اليوم، ومكان معين، تعرف تقعد فيه مع نفسك وبس، مفيش حد تاني معاكم! ودي بيسموها الخلوة أو العزلة، يعني تختلي بنفسك وتقعد كده تعمل كل اللي إنت عايزه على روقان تتخلص من المشتتات، وتشتغل على رفع حالة صفاء الذهن والتفكير الهادئ . فكرة الإنعزال دي فكرة ناجحة جداً لتحقيق هدف ما🎯، وإنجازه بدقة، و تركيز، و بسرعة كبيرة .. علشان كده حاول تطبق مبدأ الانعزال ده علي قد ما تقدر في حياتك.. يعني لو في المذاكرة مثلاً اعزل نفسك عن كل حاجة حتي لو هتعزل نفسك في أوضتك و تقفل علي نفسك بالمفتاح . انعزال تااااااااام ما تفتحش غير علشان حد بعتلك أكل، وتاكل جوه أوضتك و ما تخرجش غير للحمام . وطبعا الإنعزال ده أساسه إنك تسيب الموبايل بتاعك بره الأوضة و أكيد مايكونش في الأوضة تليفزيون ولا لابتوب ! ده غير إنك في الخلوة دي ممكن تروح مكان فيه مناظر طبيعية، وتقعد تمارس عبادة من أعظم العبادات وأكثرها تأثيراً في القلب والنفس "عبادة التفكر" تأمل في ابداع ربنا العظيم في الكون، بديع السماوات و الأرض تبارك وتعالى واستشعر عظمة ربنا وملكه وقدرته قد إيه حاول تتفكر وتتأمل في كل حاجة حواليك في الكون، هتلاقي تثبيت للإيمان في قلبك ويقين ومتعة وانشراح صدر ومقامات إيمانية عالية جدا تأمل في الجمال، هتلاقي حياتك كلها ملاها الجمال، هتلاقي عينك بقت تشوف كل حاجة بنظرة الجمال .. - هتقول : بس أنا ببص في النجوم والسما والسحاب والشجر والشمس والقمر ومبحسش بالكلام ده .. أعمل إيه ؟!! - هقولك : المشكلة إنك اتعودت كل يوم تبص للحاجات دي، فأصبح الموضوع عندك عادة ومألوف حاول بقى تنسى العادة ، وتغير نظرتك وتبص لكل حاجة في الكون من جديد وكأنك بتشوفها لأول مرة ! وساعتها هتبدأ تشوف إبداع وجمال ملهوش آخر !! #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣3⃣ رمضان آخر روقان 🎆🌜 📝تابع خطوات مهمة 4⃣1⃣ عينك👀 على عينك ! يعني إيه ؟؟؟!! يعني خلي بالك دايما من عينك واحفظ بصرك عن كل ما حرم الله ! اللي بيشتكي من قسوة قلبه .. اللي مش عارف يخشع في الصلاة ..اللي مش عارف يبكي من خشية الله اللي مش قادر يقوم الليل اللي مش حاسس بلذة الطاعة !! عارف يا حبيب قلبي أهم سبب لكل ده إيه ؟؟؟! أهم سبب هو المعاصي اللي عمّالة تتراكم على القلب وأخطر المعاصي وأشدها تأثيرا على القلب هو : النظر لما حرم الله !! اللي بيتفرج على المواقع القذرة والأفلام الهابطة و كليبات الرقص والفجور ! هنقوله: انت مستحمل تعيش إزاي وقلبك فيه كل النجاسات دي ؟؟!! ده إنت محتاج "عملية قلب مفتوح علشان نشيل كل ده من جذوره وننضف ونطهر ونعيد الحياة لقلبك من جديد !! حرام عليك قلبك تعمل فيه كده !!! كفاية بقى !!! أما اللي بيستقل بالنظر للبنات المتبرجات في الشارع والجامعة والمذيعات والممثلات في التليفزيون وصور البنات في النت ويقولك: ياعم دي حاجة عادية جداً جداً ! هنقوله : يا أخي النظرة اللي بتسميها عادية دي هي سبب ضياع قلبك! لأن العين منفذ القلب !! العين مراية القلب !! العين بريد القلب !! والصور دي كلها بتنطبع في القلب وتتعلق على جدرانه وتشوش على الايمان جواه .. وعلشان كده النبي ﷺ سمى النظرة اللي إنت بتستقل بها دي "زنا" قالﷺ : ( العينان تزنيان، وزناهما النظر )رواه مسلم، يعني النبي ﷺ بيحذرك وبيقولك إوعى تستقل بنظرة !! النظرة دي سهم مسموم بيدخل على قلبك يقعد يقطع فيه ! النظرة سهم مسموم بيجرح في قلبك ويبهدله،لحد ما يدمّر الإيمان في قلبك ويموته !! وخد بالك إن كل نظرة حرام بتنظرها بتكون : نقطة سودا على قلبك ! والنقط دي تتجمع على قلبك وتعمل: غلاف أسود !! فتخيل بقى لو قعدت تتابع فيلم ولا مسلسل ساعة واحدة، هتنظر فيه کام نظرة حرام ؟؟؟ تخيّل قلبك بعده هيبقى شكله إيه ؟؟؟!!! ليه تعمل في قلبك كده ؟؟!!!! يا حبيب قلبي لو عايز بجد تحس بلذة الطاعة وتدوق حلاوة الإيمان ...احفظ بصرك عن محارم الله !! يا أختي .. لو عايزة تلاقي قلبك خاشع ولاقط إرسال إيماني على طول وبأعلى إشارة وتردد ... احفظي عينك وحافظي على قلبك !! وَرَدَ في الأثر : [من غضْ بَصَره ، أثابه الله إيماناً يجد حلاوته في قلبه ] وعمومًا محتاجين نحافظ على قلوبنا مش من النظر الحرام وبس، بل من كل المعاصي، لأن المعاصي بتعمل حجاب وحاجز كبير جداً بين قلوبنا وبين الاحساس بلذة العبادة .. وهي دي أعظم عقوبة للمعاصى حرمان لذة الطاعات وإن غفل الانسان عن رؤية العقوبة دي بسب قلة بصيرته وضعف إيمانه أو فساد قلبه .. لكنها واقع ملموس للجميع . قال الإمام ابن الجوزي رحم الله : [قال بعض أحبار بني إسرائيل: يارب كم أعصيك ولا تعاقبني؟! فقيل له: كم أعاقبك وأنت لا تدري !! أليس قد حرمتك حلاوة مُناجاتي ؟؟! ] إزاى هتحس بمعاني القرب من ربنا وإنت بتعصيه ومش عايز تتوب ؟؟! إزاى عايز تحس بالراحة واللذة في قلبك وإنت مُصمّم تهدم كل الإيمان اللي بيتبني في قلبك بإصرارك على المعصية ؟!!!!! راجع نفسك #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣4⃣ رمضان آخر روقان 🎆🌜 توصيات عملية تعالوا نشوف بعض التوصيات العملية الخاصة بكل عبادة على حدة، واللي ممكن تساعدنا في تحسين أداءنا لها، وتكون خطوة على طريق الاحساس بلذتها ومعانيها بإذن الله . 1⃣ توبة .. بروقان .. عارف لما تكون مهموم ومتضايق ومخنوق من غير سبب !! لما تحس إن نفسك تقعد لوحدك وتبكي يمكن ترتاح شوية ..!! إحساس إنك تايه ومش لاقي نفسك ومش عارف تعمل إيه؟!! إحساس رهيييب بيخليك مش حاسس بأي طعم للحياة ..!! عارف الحل إيه ؟؟؟ ✅الحل بكل بساطة: إنك ترجع للي خلقك وهو هيصلح لك حياتك كلها إنك تتوب لربك حبيبك اللى مفيش حد في الكون كله أحن عليك ولا أقرب لك منه سبحانه وتعالى عارف التوبة الصادقة هتعمل في حياتك إيه ؟ 🤍التوبة هتخليك إنسان مختلف بروح مختلفة تماااااااااااااماً إنسان مقبل علي الحياة ..مُتصالح مع نفسك .. عايش معنى السلام النفسي الداخلي. 🤍التوبة هتوقف الحرب العالمية التالتة اللي دايرة جواك وعاملالك صراع نفسي منكد عليك عيشتك !! 🤍التوبة هتخليك تعيش الحياة الطيبة المطمئنة اللي ربنا وعد بها أي حد هيمشي في طريقه، أحلى حياة في طاعة الله 🤍التوبة هتخليك تحس وتدوق لذة وحلاوة العبادة .. لأنها: أولاً : هتطهر قلبك وتزيل طبقات السواد اللي عليه ثانياً : عدم التوبة بيخليك في قمة الاكتئاب والإحباط و بيأثر على نفسيتك جدا والاحساس بالعبادة مرتبط ارتباط وثيق بحالتك النفسية فطالما نفسيتك مش متظبطة ، هيبقى صعب تعرف تخشع وتحس بلذة العبادة؛ لأنك مش في "الموووود" أصلا ..! ✅ورمضان فرصتك .. رمضان فرصة متتفوتش للتوبة، وده لأن كل حاجة فيه بتشدّك للطاعة وبتبعدك عن المعصية فلو مش هتتغير في رمضان .. هتتغير إمتى بعد كده ؟؟! لو حالك مش هينصلح في رمضان .. هينصلح إمتى ؟؟!! #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣5⃣ رمضان آخر روقان 🎆🌜 تابع توصيات عملية يالا خد قرار التوبة فورًا ، ورجع الحياة لقلبك من جديد حط نقطة لحياتك القديمة وإبدأ من أول السطر كإنسان جديد وخلي رمضانك السنة دي نقطة تحول و بداية لأجمل حياة وخد شوية النصايح دي لعلها تنفعك بإذن الله ✅في كل مرة هتجدد فيها التوبة ، أول حاجة تعملها، هي إنك تحس بنعمة ربنا عليك، وتشكر ربك بجد من قلبك إنه مد في أعمارنا لحد ما لحقنا نتوب ومامتناش وإحنا بنعمل أي معصية من معاصينا اللي متتعدش ! وحس بقلبك بالنعمة العظيمة دي ، وقول يارب لك الحمد والشكر الذي لا ينتهي على نعمة الستر والامهال ! ✅علشان متبقاش التوبة بمشاعر باردة ملهاش أي طعم، لازم تحقق ركن التوبة الأعظم اللي هو الندم يعني لازم تحس بحرارة الذنب والحرقة، وينكوي قلبك بنار الاحساس بمخالفة أمر ملك الملوك جل جلاله وعصيانه ..! ومفيش حاجة هتخليك تقدر تحس بالمعاني دي غير إنك تعرف ربنا وقدره وملكوته وجبروته وكبريائه وعظمته وعزته وجلاله، وساعتها بس هتعرف حجم وعظمة وخطورة اللي إنت عملته، وهتلاقي قلبك بيتقطع من الندم والحياء من ربنا ! ✅اللي بيقول أنا ضعيف ومش قادر أقاوم .. هقوله: أيوه إنت ضعيف جدًا جدًا واللي هيعمل فيها "سوبر مان"برده أضعف ما يكون ومعرض للفتنة في أي وقت ربنا خلقك كده علشان متتفرعنش، علشان تنكسر وتذل وتطلب منه إنه يقويك ويعينك وهو عزوجل القائل في الحديث القدسي : ( يا عبادي كلكم ضال إلا من هديته؛ فاستهدوني أهدكم) ✅بطل شكوي بقي ، وإبدأ العلاج ..متقعدش تقول : نفسي أصلي .. نفسي أبطل تدخين .. نفسي أبطل بنات.. نفسي أبطل مواقع .. نفسي نفسي .. !! وبعدين؟! آخرتها إيه ؟ هتفضل طول عمرك تشتكي كده؟؟ اتحرك من مكانك وخد خطوات .. مفيش أي حاجة هتتغير وإنت قاعد في مكانك.. والكلام عمره ما كان حل.. آه هتتعب شوية بس الموضوع هو مصيرك، جنة أو نار، مش ثانوية ولا ماجستير ولا وظيفة، يعني يستاهل التعب والبهدلة كمان ! #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣6⃣ رمضان آخر روقان 🎆🌜 تابع توصيات عملية ✅المعصية مش بتيجي من الصدفة بل لها مقدمات وأسباب زي أي حاجة في الدنيا .. فلو عرفت تمنع الأسباب دي ، يبقى إنت كده قطعت الحبل اللى بيشد رجلك لها كل شوية .. يعني خلّي بينك وبين المعصية : "عزلة شعورية" و "عزلة جسدية" يعني تبعد عن الحاجات اللي بتوقعك في المعصية، وكذلك الحاجات اللي حتى ممكن تفكرك بها وتثير مشاعرك لها .. اقفل أي باب🚪 ممكن يوصلك للمعصية تمااااما .. وسد نقط ضعفك اللي إنت عارفها كويس أوي وحافظها كويس، ومع ذلك سايبها بتوقعك كل مرة .. وكل واحد طبيب نفسه دي أهم نقطة عملية في روشتة العلاج . دي الدليل الأكيد إنك عايز تتوب بجد، مش كلام وخلاص .. ✅اشغل نفسك الواحد نفسه يصرخ بأعلى صوته ويقول لكل الشباب إن الفراغ الفكري والفراغ العملي هو سبب كل مصيبة !! معادلة الهلاك : فراغ + شيطان + نفس = مصايب وبلاوي سودا ونفسك لو لم تشغلها بالطاعة ، فتأكد مليار % إنها هتوديك للمعصية ! فحاول تشغل نفسك بأي شئ مفيد في الدنيا!! ✅المعصية بتبدأ من فكرة صغنووووونة قد كده، سبتها إنت تسرح في دماغك لحد ما كبرت واتحولت لإرادة ثم فعل ! فـ قاوم الفكرة من بدايتها، وحاول تهرب منها وتلغيها بإنك تفكّر في حاجة تانية تعملها ◀️ولو معرفتش وسيطرت هي عليك ، يبقى تعمل هجوم مضاد عليها وتواجه الفكرة بواقعية، وتعمل موازنة ومقارنة بين مقدار لذة المعصية ومدتها وتكلفتها، والعواقب اللي هتجنيها بعدها في دنيتك وآخرتك ومقدار لذة الإقبال على الله ومدتها، والعواقب اللي هتفوز بيها في دنيتك وآخرتك، و تحكم عقلك وتختار بنفسك ساعتها .. وإنت سيد قرارك ! ✅لما تبقى ناوي تعمل ذنب وعارف إن اللي بتعمله ده غلط وحرام وتقول هتوب بعدها وربنا هيغفرلي، اعرف وقتها إن ده من تزيين الشيطان علشان يخليك تعمل خطوة يسحب رجلك منها للمعصية، وبعدين يغرقك في بحورها لحد ما تدمنها وتعيش أسير وعبد لها ! وبعدين يودِّيك لمعصية تانية أكبر، وهكذا لحد ما تموت وإنت على معصية وسوء خاتمة في نهاية الأمر ! وهي دي خطته المحفوظة اللي ربنا حذرنا منها ومع ذلك محدش عايز يتعظ ! #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣7⃣ رمضان آخر روقان 🎆🌜 تابع توصيات عملية ✅لما توصل لمرحلة إنك خلاص مش قادر تقاوم وخلاص هتعمل المعصية، اركب تاكسي الزمن واطلع به للمستقبل، لقدام ساعتين من عمرك، وشوف بعد المعصية إيه اللي حصل ؟؟ ولا أي شئ !!! المعصية اتعملت واللذة انتهت ومبقاش غير الحسرة والذنب !! وبس!! كل اللي إنت عملته كانت آخرته شهوة وعدت وانتهت من غير أي فايدة!! وطالما الموضوع كده كلم نفسك وقولها ببساطة هعتبر نفسي زي ما بعملها كل مرة وبتعدي وتنتهي ، كأني عملتها المرة دي وشبعت منها وعدت خلاص ..! ✅أول ما تقع في أي معصية اجري على التوبة .. أتبع السيئة الحسنة تمحها زي ما ربنا عزوجل قال: ﴿ثُمَّ يَتُوبُونَ مِنْ قَرِيبٍ} ف متستناش لحظة بعد الذنب .. متفكّرش كتير .. متروحش حتة، قوم فوراً، اتوضا أو اغتسل، وهات السجادة وصلي ركعتين توبة لله واسجد وابكي.. اسجد لربك وقوله "ياربي أذنبت .. وقعت غصب عني يارب .. وجايلك وأنا معترف وندمان وذليل .. رجعتلك يارب لأني عبدك الضعيف ومليش رب غيرك .. وكلي أمل ويقين إنك هتقبلني وتتوب عليا وتغفر لي يا أرحم الراحمين " ✅على وضعك اثبت على الطريق واوعى تفكر تسيب أي طاعة بسبب الذنوب اللي بتعملها . واعرف إن فعلك للمعصية مش معناها إنك انتكست؛ لأن مصطلح الانتكاس معناه إنك سيبت الطريق خالص ورميت طوبة الموضوع !! إنما الضعف والعودة للذنب معصية زي أي معصية ، هتتوب منها وبإذن الله هتقدر تبعد عنها في يوم ما.. #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣8⃣ رمضان آخر روقان 🎆🌜 تابع توصيات عملية ✅متجلدش نفسك .. متحطمش حياتك طبيعي إنك ممكن تقعد فترة كويس جدا وبايمانيات عالية كمان، ولكن تقع بعدها في أي معصية كل بني آدم خطاء.. كلنا بشر وبنغلط.. مفيش حد معصوم من الغلط....كل الناس بتغلط ومش معنى الكلام إني بهوّن الموضوع أو بقولك إعمل اللي إنت عايزه، لأ طبعاً، المقصد هو إنك مش المطلوب منك إنك متغلطش، المطلوب إنك تجاهد نفسك على قد ما تقدر، ولو وقعت في أي وقت تقبل الواقع وتقوم بسرعة وتكمل طريقك .. ✅إيااااااااك واليأس إياك والإحباط .. إياك والقنوط .. إياااااك تقول مفيش فايدة !! إياااااااك تقول أنا مش نافع !! إياااااااااااااك تقول تعبت وكرهت نفسى وكرهت حياتى !! اليأس ده أكبر جريمة وأبشع ذنب ممكن تعمله في حياتك !! فإوعى تيأس حتى لو وقعت في جميع الكبائر.. ارجع وتوب وربك هيقبلك مهما عملت .. وافضل كده لحد آخر نفس في عمرك.. لحد ما تلقى الله وإنت بتجاهد نفسك وبتتوب.. اغلط وتوب.. واغلط وتوب .. واغلط وتوب مليون مرّة .. وافضل كده طول عمرك تتوب وتندم وتستغفر بس المهم إنك لا تتمادى في أي ذنب وتتوب بسرعة أول ما تقع فيه ✅خليها لازمة على لسانك " اللهم طهرني" ، اللهم "قني شرَّ نفسي وألهمني رشدي" ، وصدقني هييجي الوقت وربنا هيتقبل منك.. #يتبع غداً بإذن الله #رمضان_آخر_روقان #مصطفى_زايد |
رد: رمضان اخر روقان 🎆🌜 1⃣9⃣ رمضان آخر روقان 🎆🌜 تابع توصيات عملية ٢_قراءة قرآن .. بروقان.. رمضان هو شهر القرآن، وكتيييييير مننا لما بيسمع إن فيه ناس بتختم القرآن أكتر من مرة في رمضان، بيبقى عايز يعمل زيهم وأكتر منهم كمان ولكن للأسف حرصه على الختم بيخليه يقرأ بسرعة، وياكل الحروف، ويضيّع التجويد، ويعطل العقل عن إنه يفهم، والقلب عن إنه يتدبر ولو آية واحدة !! لأن كل همه وقتها بيبقى نهاية الصفحة أو نهاية السورة !! تسمعه وهو بيقرأ وكأنه في سبق و حد بيجري وراه !!! يا أخي ده إنت لو بتقرأ خبر في جريدة هتركّز فيه وتقرأه باهتمام وتمعن أكثر من قراءتك للقرآن بالطريقة دي ! لو بتقرأ مذكرات الدراسة مش هتقراها بالشكل ده !!! يا شباب .. لازم نعرف إن ختم القرآن مش مطلوب لذاته !! يعني مش هو الهدف !! مش مطلوب إني أقعد ساعة واتنين وتلاتة كل اللي بعمله إني بقلب في صفحات ورق ورا بعض، وبعدين أقفل المصحف وأقول الحمد لله ختمت القرآن !! ✅الهدف يا حبيب قلبي هو إنك تقرأ بتركيز وخشوع، وتحاول تفهم وتتدبر، وتعمل باللي فهمته، وبالتالي يأثر فيك القرآن ويغير حياتك للأفضل طبعاً كما قال تعالى : {كتَابٌ أَنزَلْنَاهُ إِلَيْكَ مُبَارَكٌ لِيَدِّبِّرُوا آيَاتِهِ وَلِيَتَذَكَّرَ أُولُو الْأَلْبَابِ} ✅يعني إنك تقرأ آية واحدة بتدبر وتأمل وفهم وتعمل بها أفضل من إنك تختم القرآن كله من غير ما تكون فاهم ولا واعي أي شئ من اللي بتقرأه !! ولذلك كان بعض الصالحين يقول : [ آية لا أتفهمها ولا يكون قلبي فيها، لا أعد لها ثوابا !] ✍قال الإمام ابن القيم رحمة الله في مفتاح دار السعادة : [ لو علم الناس ما في قراءة القرآن بالتدبر، لاشتغلوا بها عن كل ما سواها ؛ فقراءة آية بتفكر خير من ختمة بغير تدبر وتفهم، وأنفع للقلب، وأدعى إلى حصول الإيمان وتذوق حلاوة القرآن ] فمتخليش تفكيرك وهمّك كله في عدد الختمات، مش مهم هتختم كام مرة 🟢المهم هو قلبك هيدخل فيه كام آية من القرآن ويتعلق بيها ؟؟؟ 🟢المهم هو هتقرّب من ربنا قد إيه بسب القرآن ؟؟؟ 🟢المهم هو حياتك كام حاجة هتتغير فيها بسبب القرآن ؟؟ عايزين نخرج من رمضان متعلقين بكل سورة من القرآن فلو قولتلك انطباعك عن السورة ديه إيه؟، يكون في قلبك مشاعر ومعاني ناحيتها يكون فيه بصمات سابتها السورة على قلبك يكون فيه آيات منها أصبحت شعارات تعيش بها حياتك #يتبع غداً بإذن الله #رمضان_آخر_روقان #مصطفى_زايد |
| الساعة الآن 02:07 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 PL2
ارشفة ودعم SALEM ALSHMRANI
F.T.G.Y 3.0 BY: D-sAb.NeT © 2011
جميع الحقوق محفوظة لمنتديات بني بحير بلقرن