ياجرحي استأذنك بنام لي ساعـه
وارجو دخيل الله انك لاتصحّيني
●●●
لي خمسـه ايام اعيش السّمع والطّاعـه
ولك خمسـه ايام تامرني وتنهيني
●●●
والمشكلـه جت عروق القلب فزّاعّـه
مايكفي انك سرقت النوم من عيني
●●●
دكتور وممرضـه وابرهـ وسمّاعـه
في كل ليله ولايدرون وش فيني
●●●
ياسيدي الجرح قلبي يشتكي راعـه
لا الذنب ذنبي ولا الموضوع بيديني
●●●
حبيت واخلصت واثر الحب فقّاعـه
روّح وباقي يموّتني ويحييني
●●●
غيري هدر دم عشق وللاسف باعـه
غيري قتل كل حب بحد سكيّني
●●●
وانا اللي اصبحت للأخطاء شمّاعـه
وادفع ثمن كل غلطه من محبيني
●●●
قبلي من العشق ناس ٍ تشكي اوجاعـه
قالوا متاهـه وانا جيتـه برجليني
●●●
بدايته سلسلـه والنّفس طمّاعـه
اغراني ادري ولا به شي يغريني
●●●
واليوم لو قلت يااهل الحب وطباعـه
انتوا على دينكم وانا على ديني
●●●
اجبرني الجرح اعيش السّمع والطّاعـه
حتى ولو قلت له ياجرحي اعفيني
من خمسة ايام وآنا في رجا ساعـه
وان جيت بنامها جرحي يصحّيني