[سيدالعيون]

من اقرب قريب

يا كبرها لاجات من أقرب قريب وفي الصميم

من شخص تتنفس هواه ولليالي ذاخره

اللي حياتك كانت بقربه نعيم ٍ في نعيم

ومن غلطتن منـّه حسبها مـِنـْك جاك من آخره

وش حيلتك لا كانت الدعوى قهر وقت الصريم

وتحس دودة الأرض جالت في عظامك ناخره

يضيق صدرك والقلوب تذوب وضلوعك هشيم

حتى النسم تبغاه و ماياتيك مالله صاخره

كـنـّـك من أهل البحر وسط الموج والرؤيه عديم

والباخره قفت وعينك تلتفت للباخره

الحظ عاندني قهر يا حظ يا حظي السقيم

ماكنّـك إلاّ عبد سوّ ٍ فـِـتـّـحت مناخره

تزهم ، تعزوا ، تحتزم ، ما ينفعك سلم ٍ قديم

ما ينفعك طيب ٍ وهبته للوجيه الساخره

ما هو إبـاقي غير قلبك إن وهبته للسديم

إبيحترق طيبه فخر وتفوح به مباخره

ويظل ذكره وإحترامه دامني حي ٍ مقيم

وإن مات يبقى للبشر أكبر علامه فاخره

وإن كان بدمح زلتك يانور في وقت العتيم

شف عادها بقلبي كبيره والمعاني زاخره

والأوله و الآخره والله وبالله العظيم

الذخر يبقى لي ذخر في الأوله و الآخره