[الرهيب]

فوائد الجاز الابيض للشعر ⁦☄️⁦☄️⁩ :
..
١ ) التهابات فروة الرأس
٢ ) تقصف و تلف الشعر
٣ ) تساقط الشعر
..
طبعاً ميخفاش عن حد فيكم تريند الجاز المنتشر الفتره اللي فاتت و البنات بتنصح بعضها بيه و ابتدت كمان مصانع تحت بير السلم تستغل الموقف و
منتجات مجهولة التركيب بيدعوا أنها جاز ابيض مخصص للشعر و خلاص بقت منتشره في جروبات السكين كير المضروبه و بقي بنات كتير عمالين يعملوا ليا منشن علي بوستات من النوعيه ده لذلك وجب التنويه علي الفوائد بتاعته و طبعا اللي حابب يتمتع بالفوايد دي و لسه مصمم يستخدمه هو ادري 🤷
..
والله لولا الخصوصية بتاعة اي حد بيتابعني و يسألني كنت حطيتلكم اكتر من سكرين شوت لبنات شعرها اتدمر و اتبهدل و اتحرق حرفيا بعد استخدام الجاز و بيبعتولي انهم مش عارفين خلاص يصلحوه باي شكل من الأشكال
..
و لو لسه مقتنعتيش برضه هعمل محاوله اخيره و افهمكم مدي الكوارث اللي ممكن يعملها الجاز من الناحيه العلميه
- الجاز ده مشتق من مشتقات النفط اللي بيستخرجوه من باطن الأرض و يطلعوا منه الجاز و البنزين و الزفت و القطران
- الجاز ده ماده قابلة للاشتعال يعني لاقدر الله لو حطتيه علي شعرك و دخلتي المطبخ و قربتي من البوتجاز لأي سبب كان تخيلي ايه اللي ممكن يحصل !
- الجاز ده بيستخدم لقتل الحشرات و السوس و بيستخدم ك وقود لبعض انواع المحركات فتخيلي بقي انتي تحطية علي شعرك !
- الجاز ماده كيميائيه قوية يعني لو لاقدر الله فروة رأسك حساسه ممكن يسببلها التهابات و حروق و لو لامس عنيكي كذلك ممكن يسببلها التهابات قويه
- الجاز ريحته قويه و نفاذة يعني لو مريضة حساسية ممكن يسببلهم مشاكل قويه و ضيق في التنفس و غيرها
- الجاز مادة مذيبة للدهون فلما تحطيه علي شعرك و فروة رأسك مره مع مره هيدمر و يكسر الدهون الطبيعية اللي ربنا خلقها في الشعر علشان ترطبه و بالتالي يحصل جفاف للشعر و تقصف و تلف
- غير بقي مع التكرار برضه لاقدر الله ممكن يمتص من خلال فروة الرأس و يتراكم في الدم و خلايا الجسم و يسبب أمراض خبيثة
..
هل بجد في حاجه تستاهل انكم تعرضوا نفسكم لكل المخاطر دي !!
بطلوا تستخدموا المواد في غير محلها !! بطلوا تسلموا ودنكم لناس جاهلة بتعمل شو و خلاص !! بطلوا تجربوا في نفسكم و تأذوا نفسكم بجد و حافظوا علي نعمة الصحه اللي ربنا مديهالكوا !