[الرهيب]

هستأذنكم فى حاجه
اقعدى مع إبنك او بنتك اليومين دول عشر دقايق إتكلموا....
و انا بدأت مع بنتى ♥️
قلت لها إن التُخن و الرفع...البياض و السمار...مش حاجه بنضحك عليها....
لو شفتى بنت شعرها مختلف عن شعرك و حبيتى تحكيلى...ما تقوليش دى مختلفه....قولى دى مميزه

مش التوكه و اللبس اللى بيخلوكى حلوه...انتى اللى بتزينى اللبس و تحلّى التوكه....هم حلوين علشان انتى لبساهم

أحلى حاجه فى جسمك...إنه شايل روحك الحلوه❤️

و اهم واحد لازم يشوفك حلوه.....نفسك

الشنطه الغاليه مش بتعمل قيمة للبنى آدم....البنى آدم هو اللى بيعمل قيمه للبراند....علشان هى اشياء...انما هو بنى آدم

ممكن طفل يروح المدرسه بشنطه جديده...و ممكن طفل تانى يروح المدرسه بشنطه قديمه...مش الشنطه اللى تخليه اشطر و اقرب لقب كل الناس♥️

الشنطه شىء و انت بنى آدم.....اكرم كائن خلقه ربنا...علشان عنده عقل بيميز...

كلام البنى آدم زى النحله الصغيره....الكلمه الحلوه زى العسل اللى بيطلع منها....طعمه حلو ....الناس بتحبه...بيطبطب ♥️

الكلمة الغلسه زى قرصة النحله...بتوجع صاحبها و تبعده عن كل الناس...بتكسره...بيبقى صعب يتصلّح...

الكلمة الوحشة بتوجع....التريقة بتوجع.....البنى آدم اللطيف اقرب لقلب الكل و انجح ♥️

احنا بنروح المدرسه نتعلم...ننبسط مع اصحابنا....نستمتع بهواياتنا....نعرف اكتر عن الدنيا....مش بنروح نتسابق...

اللى عايش طول عمره بيتسابق ...بيعيش طول عمره بينهج!.....مش بيلحق يبص حواليه و ينبسط...

احسن واحد مش اللى جاب اعلى درجه....احسن واحد اللى حاول و اشتغل.....

مش مهم ابقى احسن من حد...المهم ابقى احسن من نفسى امبارح...النهارده انا عارفه اكتر...سعيده اكتر....متطمنه اكتر...ده النجاح الحقيقى

كل واحد فى اصحابك شاطر فى حاجه.... ربنا لو اخد من حد حاجه بيديله حاجه غيرها...ساعات يديهاله فى نفس اليوم.. و ساعات يحوشله هدية اكبر ليوم بعيد

لما تحسى ان فيه حاجه مش عندك....اكتبى قدامها ٥ حاجات عندك و ما تقدريش تستغنى عنهم ♥️

العين اللى بتقارن ما تعرفش ترضى...و اللى مايعرفش يرضى ما يعرفش يفرح....

حسب عمر طفلك وصليله اللى يقدر يستوعبه... اخلقى عالم افضل فى المدرسه لأطفال كتييير ...و ريحى اهالى كتير المجتمع ضاغطها

ربنا يبارك فى الاولاد و يقوينا ♥️