[الرهيب]

بمناسبة قانون الايجار القديم..

والدي الكريم رحمه الله كان عنده اكثر من عيادة وكانوا ايجار قديم وكانوا في اماكن مميزة جدا.

في احد السنين قرر والدي انه هيقفل عيادة منهم علشان الموضوع اصبح متعب عليه مع تقدم العمر.
وقتها كان اي حد علشان يسيب شقة في موقع زي دا بياخد "خلو" مبلغ كبير جدا.

وقتها بدأنا نسأل انا واخواتي مبلغ الخلو في المنطقة دي بيبقا في حدود كام علشان مايتضحكش علينا، وروحنا نقول لبابا المفروض تطلب كذا علشان صاحب العمارة اكيد هيعرض رقم قليل.

فوجئنا ان بابا بيقولنا انا سلمت الشقة خلاص!
قولناله اخدت كام، اكيد صاحب العمارة دفع رقم بخس!!
قال لنا انا روحت سلمته المفتاح وشكرته وبلغته اني مش عايز خلو لان دا مش حقي.
قلناله ازاي مش حقك واغلب الناس بتاخد؟ دا غير انه المفروض رقم كبير!!
قال انا اجرت الشقة بقيمة معينة ادفعها طول ما انا باستخدمها، واول لما قررت اسيبها اصبحت خلاص مش من حقي. ولام من حقي اخد اي مبلغ.

ساعتها مكناش فاهمين حاجة وبقينا بنتشال وبنتهبد لان العيادة كانت في مكان مميز جدا، وكنا صغيرين في السن، ففكرنا نكلم صاحب العمارة من ورا بابا، ولما بابا عرف اننا بنفكر نعمل كدا، غضب جدا وقالنا بزعيق وغضب شديد "الموضوع دا يخصني شخصيا وممنوع تماما اي حد يتكلم فيه تاني".

وقتها كنا بنضرب كف على كف ومكناش فاهمين حاجة لاننا صغيرين ولا عارفين الصح من الغلط في الموضوع دا،..

ويدور الزمن ونعرف ان اللي عمله والدنا الكريم هو الصح والحلال وان هو دا المعني الحقيقي لرد الاحسان بالاحسان، وان اللي عمله هو اللي يقدر يقابل بيه رب العالمين وهو مرتاح. وان الدرس اللي اداهولنا والدنا اعظم من اي فلوس.

وكل لما افتكر الموقف دا بكون سعيد جدا وفخور ومتأكد ان ربنا اخلف علينا بحاجات كتير حلوة في حياتنا بسبب موقف زي دا.

رحمات الله علي ابي، اللهم اجعل اليوم اسعد ايامه.
ـ ماجد مسلم