الحسم والحزم

[الرهيب]

ابيات اعجبتني فحبيت اشارك بها لانها تحث على الحسم والحزم في كثير من الامور وعدم تركها بدون اتخاذ قرار واليكم الابيات:

الزمان يدور والحية الرقطا تدور
وكل ضلعٍ نايفٍ تنطوي في فيته

وكان حنا ما دفنا الحيايا بالجحور
بعد بكره كل جحرٍ تجينا حيته

والمواقف ما تبي كود رجال جسور
وشرهة الفارس على سيفه وجنبيته

والله انّا ما ربينا على دهن السيور
نلطم المجنون ويطيب من جنيته

من خذاه ابليس للطيش واعماه الغرور
تاه بكبار النوايب صغر عقليته

ومن رمى روحه مابين الذيابه والنمور
راح حسبه من حساب العباد الميته

والدروب اثنين دربٍ ظلام ودرب نور
علمو من حث سيره يعرف نحيته

والرواسي ثابته والحقايق ما تبور
ومن يشوف الحق يعرفه من ماريته

والضلاله والردى ما وراها الا الدبور
تبطل اعمال البنادم وتفسد نيته

لين يحدر للمتاهات مع درب الحدور
قدم وقت يحد نابه لا شاف ضحيته

والحقيقه قلت اوضح لهم بعض الامور
عالمٍ تحسب حقوق الرجال مهيته

المريض يحصل الطب من ماض العصور
والمرض يصرف علاجه حسب نوعيته